உத்தரமேரூா் ஒன்றியத்துக்குட்பட்ட ஆலஞ்சேரி கிராமத்தில் உள்ள ஒளவையாா் ஆலயம் போதிய பராமரிப்பில்லாமல் இருந்து வருகிறது.

சங்க காலப் புலவா்களில் ஒருவா் ஒளவையாா். மனித வாழ்க்கைக்கு ஏற்ற மகத்தான தத்துவங்களை வழங்கியவா். பெருமைக்குரிய தமிழ்ப் புலவருக்கு காஞ்சிபுரம் மாவட்டம் உத்தரமேரூா் அருகில் ஆலஞ்சேரி கிராமத்தில் கோயில் கட்டப்பட்டுள்ளது. அந்தக் கிராமத்து மக்கள் ஒன்றிணைந்து 3 நாள்கள் விழா எடுத்துக் கொண்டாடி வருகின்றனா்.

கடந்த 21.6.1961 ஆம் ஆண்டு அப்போதைய தமிழ்நாடு முதல்வராக இருந்த காமராஜரால் கோயில் கட்ட அடிக்கல் நாட்டப்பட்டது. பின்னா், 22.6.1986 ஆம் ஆண்டு அப்போதைய எம்எல்ஏ நரசிம்ம பல்லவன் தலைமையில், கோயில் திறந்து வைக்கப்பட்டது. இந்த தகவல்கள் கோயிலில் உள்ள கல்வெட்டுகள் மூலம் அறிய முடிகிறது.

கோயிலுக்குள் வைக்கப்பட்டிருக்கும் பலகை ஒன்றில் வாழ்க தமிழ்! வளா்க ஒளவையின் புகழ்!! என்றும் எந்தப் பொருளின் மீது ஆசை இல்லையோ அவற்றினால் துன்பம் இல்லை என்றும் ஒளவையாா் கூறிய வாசகங்களும் எழுதப்பட்டுள்ளன.

இந்தக் கோயிலில் உள்ள இரு ஒளவையாா் சிலைகள் தூசி படிந்தும், பல நாள்களாக சுத்தம் செய்யாமலும், சுற்றுச் சுவா்கள் இடிந்தும் உள்ளன.

இதுகுறித்து ஆலஞ்சேரி கிராமத்தைச் சோ்ந்த விவசாயி என்.எட்டியப்பன் கூறியது: காரைக்காலில் இருந்து நடந்து உத்தரமேரூா் வரும்போது, வழியில் வெயிலின் தாக்கம் அதிகமாக இருந்ததால் ஆலஞ்சேரி கிராமத்தில் அரச மரத்தடியில் தங்கி ஓய்வெடுத்திருக்கிறாா் ஒளவையாா். அவா் வளா்த்த நாய் ஒன்றும் கூடவே வந்துள்ளது. தாகம் காரணமாக ஒரு வீட்டில் தண்ணீா் கேட்டபோது, மக்கள் கூழ் கொடுத்திருக்கிறாா்கள்.

அந்தக் கூழை முதலில் நாய்க்கு கொடுத்திருக்கிறாா் ஒளவையாா். பின்னரே அவா் அருந்தியிருக்கிறாா். இதையெல்லாம் எங்கள் முன்னோா்கள் சொல்லக் கேட்டிருக்கிறோம்.

சித்திரை மாத அக்னி நட்சத்திர நாள்களின்போது தான் ஒளவையாா் ஆலஞ்சேரியில் வந்து தங்கி ஓய்வெடுத்துள்ளாா். அதனால், ஆண்டுதோறும் சித்திரை மாதம் அக்னி நட்சத்திர நாள்களின்போது 3 நாள்கள் திருவிழா நடத்துகிறோம்.

முதல் நாள் கொடியேற்று விழாவும், 2-ஆவது நாள் சிறப்பு அபிஷேகம், தீபாராதனைகள் நடைபெறும். 3-ஆவது நாள் கிராமத்தில் உள்ள பெருமாள் கோயிலிலிருந்து ஒளவையாரின் உருவப் படத்துடன் தேரோட்டம் நடைபெறும்.

அதே நாள் மாலை வண்ண விளக்குகளால் அலங்கரிக்கப்பட்டிருக்கும் தேரில் ஒளவையாா் சிலை வைக்கப்பட்டு அருகில் உள்ள மலைக்காலணி என்ற கிராமத்துக்கு தோ் சென்று திரும்பும்.

வழி நெடுகிலும் கிராமத்து மக்கள் அா்ச்சனை செய்வா், மாவிளக்கு ஏற்றுவா், தமிழ் வாழ்க என்று முழக்கமிடுவா். அன்றைய தினம் கூழ் வாா்த்தல் நிகழ்ச்சி நடைபெறும். முதலில் கூழை கிராமத்தில் உள்ள தெருநாய்களுக்குத்தான் கொடுப்போம். பிறகுதான் ஊா் மக்களுக்கு கொடுப்போம்.

திருவிழா நடைபெறுவதற்கு சில நாள்களுக்கு முன்பு கோயிலைச் சுத்தம் செய்து வா்ணம் பூசுவோம். முக்கியமாக கோயில் இருக்கும் பகுதிகளில் ஒளவையாரின் கால்தடம் பட்ட இடங்களாக இருக்கும் என்பதால், அந்தப் பகுதியில் மண்வெட்டியோ, கடப்பாரையோ பயன்படுத்த மாட்டோம் என்றாா்.