நடிகா் கமல்ஹாசன் திரைப்பட தயாரிப்பு நிறுவனத்தின் பெயரில் பணம் மோசடி செய்ததாக எழுந்த புகாரின்பேரில், சென்னை சைபா் குற்றப்பிரிவினா் இரு பிரிவுகளின் கீழ் வழக்குப் பதிந்து, விசாரணை செய்கின்றனா்.
ராஜ்கமல் ஃபிலிம்ஸ் இன்டா்நேஷ்னல் நிறுவனத்தின் தலைமை செயல் அதிகாரி நாராயணன், சென்னை பெருநகர காவல்துறை ஆணையரகத்தில் அண்மையில் ஒரு புகாா் அளித்தாா்.
அதில், நடிகா் கமல்ஹாசனுக்கு சொந்தமான ராஜ்கமல் ஃபிலிம் இன்டா்நேஷனல் நிறுவனம், நடிகா்கள் சிம்பு, சிவகாா்த்திகேயனை வைத்து திரைப்படங்களை தயாரித்து வருகிறது. இந்த திரைப்படங்களில் நடிக்க நடிகா், நடிகைகள் தேவை எனவும், ஆா்வமுள்ளவா்கள் விண்ணப்பிக்கலாம் என்றும் மணிகண்டன் என்ற நபா் சமூக ஊடகங்களில் போலி விளம்பரம் செய்து பண மோசடியில் ஈடுபடுகிறாா்.
எங்களது நிறுவனத்தின் பெயரை தவறாக பயன்படுத்தி, நடிகா் கமல்ஹாசனுக்கு அவப் பெயரை ஏற்படுத்தும் வகையில் மோசடியில் ஈடுபடும் நபா் மீது கடும் நடவடிக்கை எடுக்க வேண்டும் என்று அதில் குறிப்பிடப்பட்டிருந்தது.
அந்த புகாரின் அடிப்படையில், சைபா் குற்றப்பிரிவினா் நடத்திய விசாரணையில் பணம் மோசடி நடந்தது உறுதி செய்யப்பட்டது. இதையடுத்து, அவா்கள் தகவல் தொழில்நுட்ப சட்டம், மோசடி உள்ளிட்ட இரு பிரிவுகளின் கீழ் வியாழக்கிழமை வழக்குப் பதிந்து மோசடி தொடா்பாக தீவிர விசாரணை செய்து வருகின்றனா்.
