Post

Share this post

தலைவருக்கான தோ்தல் – 93 % போ் வாக்களிப்பு

அகில இந்திய காங்கிரஸ் கமிட்டித் தலைவா் தோ்தலில் தமிழகத்தில் 93 சதவீதம் போ் வாக்களித்தனா்.
தமிழ்நாடு காங்கிரஸ் கமிட்டித் தலைவா் கே.எஸ்.அழகிரி உள்பட மூத்த தலைவா்கள் பலா் ஆா்வத்துடன் வாக்களித்தனா்.
அகில இந்திய காங்கிரஸ் கமிட்டித் தலைவா் தலைவா் பதவிக்கான தோ்தலில் மல்லிகாா்ஜுன காா்கேவும், சசி தரூரும் போட்டியிடுகின்றனா். இதற்கான வாக்குப்பதிவு நாடு முழுவதும் உள்ள காங்கிரஸ் மாநில கமிட்டி அலுவலகங்களில் திங்கள்கிழமை நடைபெற்றது.
தமிழகத்தில் சென்னை சத்தியமூா்த்திபவனில் திங்கள்கிழமை காலை 10 மணி முதல் வாக்குப்பதிவு நடைபெற்றது. 4 வாக்குப் பெட்டிகள் கொண்ட 4 வாக்குச்சாவடிகள் அமைக்கப்பட்டிருந்தன. இரு வேட்பாளா்களின் முகவா்கள் தலைமையில் வாக்குப்பெட்டிகள் திறந்து காண்பிக்கப்பட்டு, மூடப்பட்ட பிறகு வாக்குப்பதிவு நடைபெற்றது. வாக்குச்சீட்டில் மல்லிகாா்ஜுன காா்கே, சசிதரூா் ஆகியோா் பெயா்கள் இடம்பெற்றிருந்தன. அவா்களின் பெயா்களுக்கு நேராக வாக்காளா்கள் டிக் செய்து வாக்குப்பெட்டியில் வாக்குகளைச் செலுத்தினா்.
மாநில தலைவா் கே.எஸ். அழகிரி, முன்னாள் தலைவா்கள் ஈ.வி.கே.எஸ்.இளங்கோவன், கே.வீ.தங்கபாலு, கிருஷ்ணசாமி, சு.திருநாவுக்கரசா், நாடாளுமன்ற உறுப்பினா்கள் செல்லக்குமாா், விஜய் வசந்த், மாணிக்கம் தாகூா், காா்த்தி சிதம்பரம் உள்பட பலா் வாக்களித்தனா்.
93 சதவீதம் போ் வாக்களிப்பு: வாக்குப்பதிவு மாலை 4 மணியளவில் நிறைவடைந்தது. வாக்குப்பதிவுக்குப் பிறகு தமிழகத் தலைமைத் தோ்தல் அதிகாரி பிரதாப் பானு சா்மா கூறியது:
தமிழகத்தில் தோ்தல் வெளிப்படைத் தன்மையுடன் நோ்மையாக நடைபெற்றது. மொத்தம் 711 வாக்குகள் ஆகும். இதில் 662 போ் வாக்குகளைப் பதிவு செய்துள்ளனா். ஒரு சிலா் வேறு சில இடங்களில் பதிவு செய்துள்ளனா். மொத்தமாக 93 சதவீதம் போ் வாக்களித்துள்ளனா் என்றாா்.
வாக்குப்பெட்டிகள் சீலிடப்பட்டு விமானம் மூலம் தில்லி கொண்டு செல்லப்பட்டன. தில்லியில் அக்டோபா் 19 இல் வாக்கு எண்ணிக்கை நடைபெற உள்ளது.

Recent Posts

Leave a comment