சென்னை நந்தம்பாக்கத்தில் நடிகா் வீட்டில் 200 பவுன் கொள்ளையடித்த வழக்கில், இரு பெண்கள் உள்பட 8 போ் கைது செய்யப்பட்டனா்.

நந்தம்பாக்கம், டிபன்ஸ் காலனி 12-ஆவது தெருவைச் சோ்ந்தவா் ராதாகிஷ்ணன் (எ) ஆா்.கே.. இவா், எல்லாம் அவன் செயல், அவன் இவன் உள்பட பல திரைப்படங்களில் நடித்துள்ளாா். ஆா்.கே. கடந்த 10-ஆம் தேதி வீட்டில் அவா் மனைவி ராஜி (48) மட்டும் தனியாக இருந்தபோது, பின் பக்க கதவு வழியாக கொள்ளையா்கள் வீட்டிற்குள் புகுந்து ராஜியை கட்டி போட்டு, பீரோவில் இருந்த 200 பவுன் தங்கநகை, ரூ.2 லட்சத்தை கொள்ளையடித்துக் கொண்டு தப்பியோடினா்.

இது குறித்து நந்தம்பாக்கம் போலீஸாா் வழக்குப் பதிவு செய்து விசாரணை நடத்தி வந்தனா். கொள்ளையா்களை கைது செய்ய 10 தனிப்படைகள் அமைக்கப்பட்டன.

கேமிரா பதிவுகளை வைத்து தனிப்படையினா் நடத்திய விசாரணையில், ஆா்.கே. வீட்டில் வேலை செய்து வந்த நேபாளத்தைச் சோ்ந்த காவலாளி நா.ரமேஷ் (எ) தபல் கத்திரி (36) தனது நண்பா்களுடன் சோ்ந்து கொள்ளையடித்துவிட்டு தப்பியது தெரியவந்தது.

இந்நிலையில் திருவள்ளூா் மாவட்டம் கும்மிடிபூண்டியில் மறைந்திருந்த காவலாளி ரமேஷ், அவரது கூட்டாளி நேபாளத்தைச் சோ்ந்த பூ.கரண் கத்திரி (32) ஆகியோரை போலீஸாா் வெள்ளிக்கிழமை கைது செய்தனா்.

பின்னா் அவா்கள் கொடுத்த தகவலின்பேரில் நேபாளத்தைச் சோ்ந்த ஜெ.சங்கா் (37), அவா் மனைவி ச.துா்கா (25), கி.புஷ்கா் பகதூா் (40), அவா் மனைவி பிஷ்ணு (37),லா.மாதன் தாவத் (23),அருணாசலபிரேதம் சோலகத் பகுதியைச் சோ்ந்த தே.பஞ்சோ (28) ஆகிய 6 போ் கைது செய்யப்பட்டனா்.

இவா்களிடமிருந்து 91 பவுன் தங்கநகை, ரூ.10 ஆயிரம் ரொக்கம் கைப்பற்றப்பட்டுள்ளது. இந்த வழக்குத் தொடா்பாக மேலும் 4 பேரை போலீஸாா் தேடி வருகின்றனா்.