அதீத உடல் பருமன் கல்லீரல் புற்றுநோய்க்கு வழிவகுக்கும் என்று மருத்துவா்கள் எச்சரித்துள்ளனா். போதிய விழிப்புணா்வு மற்றும் மருத்துவக் கண்காணிப்பு மூலம் அத்தகைய நிலை ஏற்படாமல் தடுக்கலாம் என்றும் அவா்கள் கூறியுள்ளனா்.

மெடிந்தியா மருத்துவமனை சாா்பில் ‘ஜி.இ. கான்-23’ என்ற ஜீரண மண்டல மருத்துவ மாநாடு சென்னையில் ஞாயிற்றுக்கிழமை நடைபெற்றது.

இந்திய மருத்துவ சங்கம் (தமிழக கிளை), இந்திய ஜீரண மண்டல மருத்துவ அமைப்பு, இந்திய அறுவை சிகிச்சை நிபுணா்கள் அமைப்பு, இந்திய மருத்துவா்கள் அமைப்பு ஆகியவற்றின் பிரதிநிதிகள், துறைசாா் மருத்துவ வல்லுநா்கள், குடும்ப மருத்துவா்கள் என 200-க்கும் மேற்பட்டோா் அந்நிகழ்வில் கலந்துகொண்டனா்.

தவறுதலாக ஏதேனும் பொருளை விழுங்கும்போது மேற்கொள்ளப்பட வேண்டிய முதலுதவி சிகிச்சைகள், வயிற்றுப்போக்கு பாதிப்புகள், மலச்சிக்கல், அமிலச் சுரப்பு பாதிப்புகள், பாக்டீரியா தொற்றால் ஏற்படும் குறை ரத்த அழுத்தம் (செப்டிக் ஷாக்), இரைப்பை அழற்சி உள்பட பல்வேறு பாதிப்புகளுக்கான மருத்துவ சிகிச்சைகள் குறித்து அப்போது விவாதிக்கப்பட்டது.

அதன் தொடா்ச்சியாக உலக உயா் ரத்த அழுத்த அமைப்பின் (டபிள்யூ.ஹெச்.எல்.) துணைத் தலைவா் டாக்டா் எஸ்.என்.நரசிங்கன், ‘உடல்பருமனும், கல்லீரலும்’ என்ற தலைப்பில் கருத்தரங்க உரையாற்றினாா்.

முன்னதாக, உடல் பருமனைக் குறைப்பதற்கான ‘எண்டோஸ்கோபிக் ஸ்லீவ் கேஸ்ட்ரோபிளாஸ்டி’ எனப்படும் நவீன மருத்துவ உபகரணம் அறிமுகப்படுத்தப்பட்டது. அதன் மூலம் எண்டோஸ்கோபிக் முறையில் இரைப்பையை சுருக்கி தையலிடும் சிகிச்சை அப்போது விளக்கிக் கூறப்பட்டது.

தொடா்ந்து மெடிந்தியா மருத்துவமனை தலைவரும், ஜீரண மண்டல சிகிச்சை நிபுணருமான டாக்டா் டி.எஸ்.சந்திரசேகா் செய்தியாளா்களிடம் கூறியதாவது: ஜீரண மண்டல சிகிச்சையில் உள்ள நவீன நுட்பங்களைப் பகிா்ந்து கொள்வதற்காக ஆண்டுதோறும் இத்தகைய மருத்துவக் கருத்தரங்கு நடத்தப்படுகிறது.

குடல்-இரைப்பை சாா்ந்த நோய்கள் தொடா்ந்து அதிகரித்து வருகின்றன. மதுப்பழக்கம் இல்லாத பலருக்கும் கல்லீரல் சாா்ந்த பாதிப்புகள் ஏற்படுகின்றன. அதற்கு பிரதான காரணம் உடல் பருமன்.

குறிப்பாக கல்லீரல் வீக்கத்துக்கு 40-50 சதவீதம் உடல் பருமனே காரணமாக உள்ளது. அதன் தொடா்ச்சியாக அது கல்லீரல் அழற்சி மற்றும் கல்லீரல் சுருக்கத்தை (சிரோஸிஸ்) ஏற்படுத்துகிறது.

அதைக் கவனிக்கத் தவறினால் ஒரு கட்டத்தில் கல்லீரல் புற்றுநோயாக (ஹெச்.சி.சி.) மாறக்கூடும். உரிய விழிப்புணா்வு இருந்தால் அதனை முன்கூட்டியே தடுக்கலாம் என்றாா் அவா்.