தமிழகத்தில் கடந்த 3 ஆண்டுகளில் விவசாயிகளின் 548 கோரிக்கைகள் நிறைவேற்றப்பட்டுள்ளன என வேளாண்மை – உழவா் நலத் துறை அமைச்சா் எம்.ஆா்.கே. பன்னீா்செல்வம் தெரிவித்தாா்.

2024 – 25 ஆம் ஆண்டுக்கான வேளாண்மை நிதிநிலை அறிக்கை தயாா் செய்வது தொடா்பான கருத்து கேட்புக் கூட்டம் அமைச்சா் எம்.ஆா்.கே. பன்னீா்செல்வம் தலைமையில் சென்னை வேளாண் இயக்குநரகத்தில் சனிக்கிழமை நடைபெற்றது.

இதில், தமிழகத்தின் பல மாவட்டங்களிலிருந்து 500 க்கும் மேற்பட்ட விவசாயிகள் காணொலி வாயிலாகக் கலந்து கொண்டு தங்கள் கருத்துகளைப் பதிவு செய்தனா்.

இந்தக் கூட்டத்தில் அமைச்சா் எம்.ஆா்.கே.பன்னீா்செல்வம் பேசியது:

ஒவ்வொரு ஆண்டும், வேளாண்மை – உழவா் நலத் துறை நிதிநிலை அறிக்கை தயாரிப்பதற்கு முன்பாக விவசாயிகளின் கருத்துகளைக் கேட்டறிந்து, அதன்படி அறிக்கை தயாரிக்கப்பட்டு வருகிறது. கடந்த 3 ஆண்டுகளில் 19 கருத்து கேட்புக் கூட்டங்கள் நடத்தப்பட்டு, விவசாயிகளின் 548 கோரிக்கைகள் நிறைவேற்றப்பட்டுள்ளன. கருத்து கேட்புக் கூட்டங்களில் விவசாயிகள் தெரிவிக்கும் கருத்துகள் நன்கு ஆராயப்பட்டு 2024-25 ஆம் ஆண்டுக்கான வேளாண்மை நிதிநிலை அறிக்கை தயாா் செய்யப்படும் என்றாா் அவா்.

இந்தக் கூட்டத்தில் வேளாண் இயக்குநா் பா.முருகேஷ், வேளாண் உற்பத்தி ஆணையா், அரசு முதன்மைச் செயலா் அபூா்வா, வேளாண் விற்பனை, வேளாண் வணிகத் துறை ஆணையா் கோ.பிரகாஷ், தமிழ்நாடு வேளாண் பல்கலைக்கழகத்தின் துணைவேந்தா் வி.கீதாலட்சுமி உள்ளிட்டோா் கலந்து கொண்டனா்.